Shirkii Beesha Habargidir oo go-aano xasaasiya lagu gaaray?
Habargidir.info – Shirkii Beesha Habargidir ee Hotel SYL ka dhacay shalay 11 March 2015 waxaa isugu yimid Xildhibaanada, Wasiiradda, Madaxweynayaasha Galmudug iyo Ximan/Xeeb, Siyaasiyiin iyo Saraakiil Ciidan.Waxaa lagu falanqeeyey dhibaatooyinka abaabulan ee lagu bartilmaameedsanayo Beesha Habargidir saraakiisheeda, hantideeda iyo sharafkeeda, iyo sidoo kale xadgudubyada joogtada ee siyaasadeysan ayna ka muuqato cadaawad gaamurtey ee uu beesha Habargidir u qabo Xasan Garguurte, taasoo ku cad habdhaqankiisa guracan asagoo u isticmaalaya nidaamkii dawladnimada qaab qabyaaladeysan.
Waxaa kulanka warbixin dheer ka jeediyey Xildhibaanada Barlamaanka sida Xil. Cabdi Samad M. Maxamuud, Xildhibaan Ugaas Dhagey, Xil. Abtidoon, Xil. Jimcaale Cirfiid iyo Xil. Ubax Tahliil, waxeyna goobta ka caddeeyeen una qeexeen Wasiiradii shirka fadhiyey iney jiraan kacdoon xooggan iyo culeys sii kordhaya oo bulshada xildhibaanadu wakiilada ka yihiin ka imaanaya, kaasoo ay uga cabanayaan dawlad shaati loo soo huwiyey oo xadgudubyo joogta ah kula kaceysa dadka beeshaan u dhashey, ayna dadkaasi diyaar u yihiin iney iska celiyaan cid kasta oo xuquuqda ku soo xadgudubta, waxaana tacaddiyadaas ugu danbeeyey saraakiil qaab heyb naceyb ku saleysan loo xirxirey ayadoo saraakiishii mas’uuliyadda lahaa markii qaraxa uu ka dhacey hotel SYL ay dibadda joogaan kuwaasoo codadkii ay ku kala fasaxeen ciidamadii hawsha lahaa maalinkaas lagu cafiyey qaab beeleed iyo eex. Hey’adihii ammaanka, garsoorkii iyo madaxtooyadii qarankuba ay noqdeen hey’ado qabyaaladeysan oo dana beeleed loogu shaqeysto kuwaasoo magaca gef ku ah, loona aqoonsanayo maanta wixii ka danbeeya kuwo qabiil, aysanna dhici doonin in qabill qabiil kale u adeegsado hey’adihii dawladda, muddo 48 saacadood ah haddii aan lagu soo deyn saraakiisha dulmiga ku xirxiran in tallaabo ay ku waano qaataan Gurguurte iyo kooxdiisu ay dhici doonto..
Gabagabadii kulanka Wasiiradii madasha fadhiyay oo kala ahaa Wasiirka Arrimaha gudaha Cabdiraxman Odowaa,Wasiirka Madaxtooyadda Mahad Salaad,Wasiir ku xigeenka Arrimaha dibadda Ina Kediye iyo Wasiiru dowlaha Dastuurka Xasan Maxamed Jimcaale ayaa lagu wareejiyey hadalkii.
Shirka waxaa lagu afjaray iney Habargidir yeelato shirweyne ay ka qeybgalayaan dhamaan qeybaha bulshada hasse yeeshee mudada uu shirkaas socdo ka hor waxaa Wasiiradda iyo Xildhibaanada loo xilsaaray iney Xasan Garguurte u tagaan kana sii daayaan saraakiisha uu qafaashey, dibna xoriyadooda iyo shaqadoodii loogu soo celiyo, haddii kale mudadaas marka ay dhamaato ay noqon doonto jawaabta beeshu mid Ciidan iyo xoog loo adeegsan doono.
