Topnews:-Qeybdiid oo Gelinsoor laga celiyay – Dagaal dhexmaray labada Ciidan oo is horfadhiya?
Cabdi Qeybdiid oo ka mida hogaamiye kooxeedyada wali hubeeysan Somalia ayaa dib uga laabtay Gelinsoor kadib markii Ciidan taabacsan Madaxweyne Tima kalajeex jidka u galeen,iyagoo ku riday rasaas iskugu jirtay kuwa ka dhaca qoryaha Zuuga iyo dhashiikaha.
Qeybdiid oo ay galbinayeen todobo Gawaarida dagaalka oo ka kaxeeyay Cadaado ayaa dib ugu laabtay Cadaado.sababaha uu Galkacyo ugu socdayna waxaa la sheegay iney ugu weyn tahay sidii uu qeybtiisa uga qaadan lahaa lacag madax furasho laga qaatay Wariye u dhashay Mareykanka oo la yiraa Micheal Scot More.
“Rasaasta qoriga Zuuga iyo dhashiike ayaa nalagu soo furay jaho walba,waxaana rasaasta soo ridayay Ciidanka Gelinsoor oo siyaasad ahaan diidan Qeybdiid,waxay noo galeen duleedka Magaaladaas,waxaana dib ugu laabanay Cadaado” ayuu yiri qof la socda Wafdiga Qeybdiid oo Waagacusub Media la hadlay.
Maleeshiyo beeleed taabacsan Cabdi Qeybdiid oo ka tegay Galkacyo ayaa isku dayay inay Ciidanka degaanka Gelinsoor xoog ku dhaafaan hasse yeeshee Maleeshiyo beeleed taabcsan Tima kalajeex oo u dhashay degaanka Gelinsoor ayaa dagaal culus kala hortagay.
Maleeshiyadii u socotay inay Qeybdiid ka soo galbiso Cadaado ayaa fariisin ka sameeystay meel ku dhaw Gelinsoor,oo lagu magacaabo Farcaano.
Israsaaseeynta dhexmartay Maleeshiyada kala taabacsan Qeybdiid iyo Tima kalajeex waxay sababtay dhaawac labada dhinac,waxaana la sheegay in Sarkaal ka mida horjoogayaasha Ciidanka oo lagu magacaabo Gurey Xaw Xawle ay haleeshay xabad ka xagatay garabka,waxaana dhaawaciisa la xaqiijiyay inuusan aheyn mid adag.
Odayaal iyo Culumaa’udiin u dhashay beesha Sacad Habargidir oo Galkacyo ka tegay ayaa ku hungoobay inay Ciidanka Gelinsoor ku qanciyaan inay Qeybdiid u fasaxaan jidka Gelinsoor ,si uu Galkacyo ugu gudbo.
Taliyaha Ciidanka Galmudug Jeneral Cali Naasir ayaa Odayaasha iyo Culumaa-udiinka ugu dhaartay inuusan Qeybdiid mari doonin jidka Gelinsoor iyo degaanada ku xeeran inta uu sheeganaa Madaxweynaha Galmudug.
Cabdi Qeybdiid ayaa Maleeshiyaadkiisa ku amray inay dib ugu laabtaan Galkacyo .
“Dagaal dhexdeena ma ogoli,Ciidankeeygana waxaan ku amray inay Galkacyo ku laabtaan hadii reer Gelinsoor diideen inaan dhexmaro.waxaan iska joogi doonaa Cadaado” ayuu yiri Cabdi Qeybdiid oo hadalkiisa odaynimo aan looga baran ka muuqatay.
Gelinsoor waxaa dega beel hoosaadka uu ka dhashay allaha u naxariistee Jeneral Caydiid,waxaana lagu tilmaamaa inay yihiin beel qadiyad ahaan moowqif adag,awood ahaana ka dhisan Gaashaandhiga iyo dhaqaalaha.
Qeybdiid oo hore looga celiyay Garoonka Galkacyo,wuxuu wajahay xaalad adag,oo ku qasabtay inuu ka dego Garoonka Magaaladda Cadaado.waxaana ugu dambeyn la filayaa inuu Hobyo u bixi doono si uu halkaas uga wareego dhinaca Galkacyo.
Ciidan beeleedka Gelinsoor ka celiyay dagaal ooge Qeybdiid waxay sidoo kale awood Ciidan iyo mid bulsho ku leeyihiin Magaaladda Galkacyo oo ay degaan ahaan ku badan yihiin,waxaana qof walba Xasuustaa Maahmaahdii Gudoomiyahii gumeeystiga Talyaniga gobolka Mudug ku sheegay in awooda Galkacyo ku loolamaan beelaha QALAF AND JALAF.
MAXAY TAHAY QADIYADA CIIDANKA HABARGIDIR KA MIDEEYSAN YIHIIN IYO GODOBTA QEYBDIID KU NOQOTAY BARMADOOW?
Ciidanka beesha Habargidir ayaa ka mideeysan qadiyada inay dagaal culus la galaan Ciidanka beesha Majeerteen ee Puntland hasse yeeshee waxay diidan yihiin in taasi loo fasirto taageero la siiyay Cabdi Qeybdiid.
Beesha Gelinsoor waxay aad uga soo horjeedaa inuu degaanadooda tago ninkii sheegtay inuu dilay allaha u naxariistee Halyeeygii geeska Afrika Jeneral Maxamed Faarax Caydiid.maadama uu ka faanay inuu cudur daar iyo raaligelin ka bixiyo colaadii uu beesha ka dhex riday sanadkii 1994.
Cabdi Qeybdiid oo hore iskugu haleeyn jiray Ciiltirayaasha beesha Sacad {Reer Hilowle} ayaa sanadkii la soo dhaafay wuxuu lumiyay kalsoonidii jufa hoosaadkisa,waxayna dadka xog ogaalka sheegeen inuu maanta lumiyay xitaa kalsoonida jilib hoosaadka uu ka dhashay ee Reer Sahal.
Qeybdiid wuxuu dagaal la galay Jeneral Caydiid,wuxuuna sidoo kale majaha qabtay allaha u naxariistee Cismaan Xasan Cali Caato oo ay ilmo adeer ahaayeen.
Cismaan Caato wuxuu ahaa Deeqsi geesiya oo wixii uu heeysto siiyo bulshada iyo Ciidankiisa gaarkaa hasse yeeshee Qeybdiid waa daneeyste Baqeeyla oo aan taariikhda Isbitaal geyn wiil ku dhaawacmay difaaciisa.
Qeybdiid wuxuu Muqdisho iyo Nairobi ka dhistay guryo qurux badan,wuxuuna aaminsan yahay inuu beesha Habargidir xoog ku maquunin karo laakiin ugu dambeyn wuxuu shalaayto iyo qoomamo ka joogaa hagardaamadii uu ku sameeyay halyeeyadii beesha Habargidir sida Caydiid,Caato, Cabdi Qaasim.Elman Cali Axmed,Istarliin Cabdi Caruush, Sheekh Ibrahim iyo OOrfane.
Beelaha Habargidir ee Sida weyn u diidan Qeybdiid waxaa safka hore uga jira Ceyr,Saruur,Saleebaan ,Sacad iyo Duduble.
Dhalinyarada Habargidir waxay olole ugu jiraan in leeysk hor wareejiyo dhamaan Odayaashii bulshada kala dhex dhigay Colaada si gobolada dhexe looga hirgeliyo maamul goboleed salbalaaran.
Qeybdiid kuma dhicin taariikhda, Mana jirto ceeb uga xun in Majeerteen ka celiyaan Garoon ku yaal Koofurta Galkacyo . Lakiin Xeeldheerayaasha beesha waxay ka yaaban yihiin garasha xumida ku qasabtay inuu beesha Habargidir guud ahaan gaar ahaan beesha Sacad weydiisto cafis si Gelinsoor loo dhigo gogol ay Agoonta Sacad ku cafiyaan Cabdi Qeybdiid maadama uu Aabayaashood dilay,kana sheegtay Warbaahinta.
Sikastaba ha ahaatee, Agoonta Habargidir gaar ahaan kuwa beesha Sacad waxaa muuqata inaysan Qeybdiid ka yeelin “AABAHAA ANIGAA DILAY,HOOYADANAA ANIGAA DUMAALAY”
